Breaking News

30/12/2019

చారిత్రాత్మక సాక్ష్యాలకు సాక్షిగా 2019

న్యూఢిల్లీ, డిసెంబర్ 30 (way2newstv.in)
కాల ప్రవాహంలో 2019 అనే మరో ఏడాది గడిచిపోయింది. కోటి ఆశలతో కొత్త సంవత్సరం కోసం ఎదురుచూస్తూ.. నవ ఉదయాన్ని కాంక్షిస్తూ ఈ ఏడాదిలో జరిగిన వాటిని సింహావాలోకనం చేసుకుందాం. దేశ గతిని మార్చిన అనేక సంఘటనలు, రాజకీయ నిర్ణయాలు, వివాదాలు 2019లో చోటుచేసుకున్నాయి. ఈ ఏడాది దేశ రాజకీయ ముఖచిత్రాన్ని మార్చేసిన అనేక పరిణామాలు సంభవించాయి. ఇవి కొందరికి మోదం, మరికొందరికి ఖేదం కలిగించాయి. సార్వత్రిక ఎన్నికల్లో బీజేపీని ఓడించడానికి విపక్షాలు చేసిన ప్రయత్నాలన్నీ విఫలమయ్యాయి. దశాబ్దాల కశ్మీర్ సమస్యకు ముగింపు పలికితే, పౌరసత్వ సవరణ చట్టం వివాదస్పదమవుతోంది. సార్వత్రిక ఎన్నికల్లో అఖండ విజయం సాధించిన బీజేపీకి.. అనంతరం జరిగిన మూడు రాష్ట్రాల అసెంబ్లీ ఎన్నికల్లో మాత్రం చేదు ఫలితం ఎదురయ్యింది.సీబీఐ డైరెక్టర్, స్పెషల్ డైరెక్టర్ మధ్య మొదలైన వివాదం చినికి చినికి గాలివానలా మారి ఆ సంస్థ పరువును బజారుకీడ్చింది. 
 చారిత్రాత్మక సాక్ష్యాలకు సాక్షిగా 2019

దాదాపు మూడు నెలల పాటు కొనసాగిన ఈ వ్యవహారానికి ఈ ఏడాది జనవరిలో ముగింపు పలికారు. సుప్రీంకోర్టు జోక్యంతో 77 రోజుల అనంతరం అలోక్ వర్మ సీబీఐ డైరెక్టర్‌గా బాధ్యతలు స్వీకరించగా, ఆ మర్నాడే పదవి నుంచి తొలగిస్తూ మోదీ నేతృత్వంలోని హైపవర్ కమిటీ నిర్ణయం తీసుకుంది. సీబీఐ డైరెక్టర్‌గా బాధ్యతలు స్వీకరించిన 48 గంటల్లోపే అలోక్‌ను హైపవర్ కమిటీ తొలగించింది. ఇక, విద్య, ఉద్యోగాల్లో ఆర్ధికంగా వెనుకబడిన అగ్రవర్ణాలకు 10 శాతం రిజర్వేషన్లు కల్పిస్తూ కేంద్రం చట్టాన్ని తీసుకొచ్చింది.ఫిబ్రవరి 14న జమ్మూ కశ్మీర్‌లోని పుల్వామాలో ఉగ్రవాదులు ఆత్మాహుతి దాడికి పాల్పడి 45 మంది సైనికులను పొట్టనబెట్టుకున్నారు. ఈ ఘటనతో భారత్, పాకిస్థాన్ మధ్య ఉద్రిక్తతలు మరింత పెరిగాయి. పుల్వామా దాడికి ప్రతీకారంగా 42 ఏళ్ల తర్వాత భారత వైమానిక దళం పాక్ భూభాగంలోకి చొచ్చుకెళ్లి బాలాకోట్‌లో ఉగ్రస్థావరాలను ధ్వంసం చేసింది. పాక్‌లోని ఉగ్రస్థావరాలపై భారత్ మెరుపుదాడులు చేయడంతో సరిహద్దుల్లో యుద్ధ మేఘాలు కమ్ముకున్నాయి. పాకిస్థాన్ కవ్వింపు చర్యలకు పాల్పడుతూ ఎఫ్-16 యుద్ధ విమానంతో ఆర్మీ పోస్టులపై దాడికి ప్రయత్నించగా దీనిని భారత సైన్యం తిప్పికొట్టింది. ఈ నేపథ్యంలో ఐఏఎఫ్ వింగ్ కమాండర్ అభినందన్ పొరపాటున పాక్ భూభాగంలోకి వెళ్లి చిక్కాడు. జెనీవా ఒప్పందం ప్రకారం అభినందన్‌ను వెంటనే అప్పగించాలంటూ భారత డిమాండ్‌ చేయడం, అంతర్జాతీయంగా కూడా ఒత్తిడి రావడంతో పాక్ తలగ్గొంది. ఆయనను మార్చి 1న భారత్‌కు అప్పగించింది.మార్చిలోనే సార్వత్రిక ఎన్నికలకు నగరా మోగింది. మొత్తం ఏడు విడతల్లో పార్లమెంటు ఎన్నికల నిర్వహణకు ఎన్నికల కమిషన్ నోటిఫికేషన్ వెలువరించింది. గోవా ముఖ్యమంత్రి మనోహర్ పారికర్ మార్చి 17న కన్నుమూశారు. ఇదే నెలలో అయోధ్య వివాదం సామరస్య పూర్వకంగా పరిష్కరించేందుకు మధ్యవర్తిత్వానికి అనుమతిస్తూ సుప్రీంకోర్టు సంచలన నిర్ణయం తీసుకుంది. రాజకీయంగా సున్నితమైన ఈ కేసులో మధ్యవర్తిత్వం వహించేందుకు సుప్రీంకోర్టు రిటైర్డ్ జడ్జి జస్టిస్ ఫకీర్ మహ్మద్ ఇబ్రహీం కలీఫుల్లా నేతృత్వంలో త్రిసభ్య కమిటీని కోర్టు నియమించింది.సుప్రీంకోర్టు చరిత్రలో ఎన్నడూ లేనివిధంగా ప్రధాన న్యాయమూర్తి జస్టిస్ రంజన్ గొగొయ్‌పై లైంగిక ఆరోపణలు రావడం సంచలనంగా మారింది. దీంతో లైంగిక వేధింపుల ఆరోపణలపై దర్యాప్తు జరిపేందుకు ముగ్గురు సభ్యుల కమిటీని సుప్రీంకోర్టు నియమించింది. ఇదే నెలలోనే 2002లో గుజరాత్‌లో గోద్రా అల్లర్ల సమయంలో సామూహిక అత్యాచారానికి గురైన బిల్కిస్ బానో కేసులో సర్వోన్నత న్యాయస్థానం తీర్పు వెలువరించింది.సార్వత్రిక ఎన్నికల ఫలితాలు మే 23న వెలువడగా బీజేపీ నాయకత్వంలోని ఎన్డీయే అఖండ విజయం సాధించింది. జవహర్ లాల్ నెహ్రూ, ఇందిరాగాంధీ తర్వాత లోక్‌సభలో భారీ మెజార్టీతో వరుసగా రెండోసారి ప్రభుత్వాన్ని ఏర్పాటు చేసిన తొలి ప్రధానిగా నరేంద్ర మోదీ నిలిచారు. బీజేపీ సొంతంగా సాధారణ మెజార్టీని దాటి 303 స్థానాల్లో జయకేతనం ఎగురేసింది. బీజేపీ నేతృత్వంలోని ఎన్డీయే కూటమి మొత్తం 352 నియోజకవర్గాల్లో విజయం సాధించింది. ఇక, అరుణాచల్ ప్రదేశ్, ఆంధ్రప్రదేశ్, ఒడిశా అసెంబ్లీ ఎన్నికల్లో బీజేపీ, వైఎస్ఆర్‌సీపీ, బిజూ జనతాదళ్ పార్టీలు అధికారాన్ని హస్తగతం చేసుకున్నాయి. నవీన్ పట్నాయక్ నాయకత్వంలోని బీజేడీ ఒడిశాలో వరుసగా ఐదోసారి తిరుగులేని మెజార్టీతో ప్రభుత్వాన్ని ఏర్పాటు చేసింది. సిక్కిం ఎన్నికల్లో సిక్కిం క్రాంతికారీ మోర్చా విజయదుందుభి మోగించింది.17వ లోక్‌సభ తొలిసారిగా జూన్‌లో సమావేశమైంది. స్పీకర్‌గా బీజేపీ ఎంపీ ఓం బిర్లా ఏకగ్రీవంగా ఎన్నికయ్యారు. లోక్‌సభ ప్రొటెం స్పీకర్ వీరేంద్ర కుమార్ మూజువాణి ఓటు ద్వారా జూన్ 19న ఎన్నిక ప్రక్రియ చేపట్టగా.. సభ్యులు బిర్లాను ఏకగ్రీవంగా ఎన్నుకున్నారు. ఈ సమావేశాల్లోనే కేంద్ర ప్రభుత్వం ‘ట్రిపుల్ తలాక్’ బిల్లును రెండోసారి పార్లమెంటులో ప్రవేశపెట్టారు.జులై 1 నుంచి దేశవ్యాప్తంగా ఎంపిక చేసిన జిల్లాల్లో ‘జల్‌శక్తి అభియాన్ (జేఎస్‌ఏ)’ అమలులోకి వచ్చింది. 40 ఏళ్లకు ఒక్కసారి మాత్రమే దర్శనం ఇచ్చే కాంచీపురంలోని వరదరాజ పెరుమాళ్ల ఆలయంలోని అత్తివరదర్ స్వామి ఈ ఏడాది జులైలో భక్తులకు దర్శనమిచ్చారు. 40 సంవత్సరాలకు ఒక్కసారి స్వామి జలధివాసం నుంచి బయటకు వచ్చి 48 రోజులపాటు దర్శనమిస్తారు. ట్రిపుల్ తలాక్‌ను నేరంగా పరిగణించే ముస్లిం మహిళల (వివాహ హక్కుల పరిరక్షణ) బిల్లు-2019కు రాష్ట్రపతి రామ్‌నాథ్ కోవింద్ ఆమోదం తెలిపారు. ఇదే నెలలో అంతరిక్ష యాత్రలో భారత్ మరో మైలురాయిని అధిగమించింది. చంద్రుడి ఉపరితలంపై పరిశోధనలకు చంద్రయాన్-2ను విజయవంతంగా నింగిలోకి పంపింది.ఆగస్టులో జమ్మూ కశ్మీర్‌కు ప్రత్యేక హోదా కల్పించే ఆర్టికల్ 370, 35 ఏలను కేంద్రం రద్దుచేస్తూ సంచలన నిర్ణయం తీసుకుంది. దశాబ్దాలుగా కశ్మీర్ సమస్యకు మూల కారణమైన ఈ ఆర్టికల్ రద్దుతో పూర్తిగా భారత్‌లో జమ్మూ కశ్మీర్ విలీనమైంది. ఈ దశాబ్దంలోనే అతిపెద్ద సంచలన నిర్ణయంగా ఇది గుర్తింపు పొందింది. జమ్మూ కశ్మీర్‌ను రెండుగా విభజించి, కేంద్రపాలిత ప్రాంతాలుగా మార్చే ‘జమ్మూ కశ్మీర్ పునర్వ్యస్థీకరణ బిల్లు-2019’కు రాష్ట్రపతి రామ్‌నాథ్ కోవింద్ ఆమోదం తెలిపారు. దీంతో దేశ విభజన తర్వాత దాయాదుల మధ్య వివాదానికి కేంద్ర బిందువుగా నిలిచిన కశ్మీర్ సమస్య ఓ కొలిక్కి వచ్చింది.సెప్టెంబరు 7 తెల్లవారుజామున 1:15 గంటలకు భారత్ సహా ప్రపంచ దేశాల ప్రజలు ఎంతో ఆసక్తిగా ఇస్రో శుభావార్త కోసం ఉత్కంఠగా ఎదురు చూశారు. అయితే, చంద్రుడి ఉపరితలంపైకి దిగుతూ కేవలం 750 మీటర్ల దూరంలో ఉండగా విక్రమ్ ల్యాండర్ నుంచి భూకేంద్రానికి సంకేతాలు నిలిచిపోయాయి. దీంతో యావత్తు భారతీయులు ఒకింత నిరుత్సాహానికి గురైనా వెంటనే తేరుకుని ఇస్రోకు అండగా నిలిచారు. చంద్రుడి దక్షిణ ధ్రువంపై ఇప్పటివరకూ ఎవరూ పరిశోధనలు చేయని ప్రదేశాన్ని ఎంపిక చేసుకుని పెద్ద సాహసమే చేసింది. అయితే, ఇది 98 శాతం విజయవంతమైంది.సార్వత్రిక ఎన్నికల తర్వాత తొలిసారి జరిగిన హర్యానా, మహారాష్ట్ర అసెంబ్లీ ఎన్నికల్లో బీజేపీ అతిపెద్ద పార్టీగా అవతరించింది. అయితే, హర్యానాలో ప్రభుత్వ ఏర్పాటుకు అవసరమైన సంఖ్యను చేరుకోలేకపోవడంతో జననాయక్ జనతా పార్టీతో కలిసి ప్రభుత్వం ఏర్పాటుచేసింది. ఇక మహారాష్ట్రలో బీజేపీ- శివసేన కూటమి విజయం సాధించినా అధికారానికి మాత్రం కమలం పార్టీ దూరమైంది. అధికారాన్ని చెరో రెండున్నరేళ్లు పంచుకుందామని శివసేన చేసిన డిమాండ్‌ను బీజేపీ తిరస్కరించింది. దీంతో కాంగ్రెస్-ఎన్‌సీపీలతో కలిసి ప్రభుత్వాన్ని ఏర్పాటుచేసిన శివసేన... తన పంతాన్ని నెగ్గించుకుంది. దీనికి ముందు మహారాష్ట్రలో రాజకీయాలు అనూహ్య మలుపులు తిరుగుతూ ఎత్తులు పైఎత్తులతో సాగాయి.దేశంలో రాజకీయ, సామాజిక, మతపరమైన అంశాలను ప్రభావితం చేసిన అయోధ్యలోని బాబ్రీ మసీదు- రామమందిర వివాదానికి నవంబరులో సుప్రీంకోర్టు ముగింపు పలికింది. దాదాపు 135 ఏళ్లుగా కొనసాగిన వివాదానికి సర్వోన్నత న్యాయస్థానం తీర్పుతో కొలిక్కి వచ్చింది. అంతేకాదు, ఇది ఈ దశాబ్దపు గొప్ప తీర్పుగా చరిత్ర పుటల్లోకి ఎక్కింది. అయోధ్యలో వివాదాస్పద భూమి హిందువులకే చెందుతుందని, మసీదు కోసం ఐదెకరాల స్థలం కేటాయించాలని సుప్రీం ఆదేశించింది. దీంతోపాటు అయ్యప్ప ఆలయంలోకి మహిళలను అనుమతిస్తూ గతంలో ఇచ్చిన తీర్పుపై రివ్యూ పిటిషన్లను విచారించిన సుప్రీంకోర్టు.. ఈ వివాదాన్ని విస్తృత ధర్మాసనానికి బదిలీచేసింది.పాకిస్థాన్, అఫ్గనిస్థాన్, బంగ్లాదేశ్‌లో మత హింసను ఎదుర్కొని భారత్‌కు శరణార్ధులుగా వచ్చినవారికి పౌరసత్వం కల్పించే ఉద్దేశంతో 1955 నాటి పౌరసత్వ చట్టంలో సవరణలు చేసిన కేంద్రం ఎట్టకేలకు దీనిని ఆమోదింపజేసుకుని తన పంతం నెగ్గించుకుంది. ప్రస్తుతం దేశవ్యాప్తంగా ఈ చట్టంపై ఆందోళనలు, నిరసనలు వెల్లువెత్తుతున్నాయి. యూపీ, ఢిల్లీ, పశ్చిమ్ బెంగాల్ సహా ఈశాన్యా రాష్ట్రాల్లో ఆందోళనలు హింసాత్మకంగా మారి 27 మంది ప్రాణాలు కోల్పోయారు. వందలాది మంది గాయపడ్డారు. జార్ఖండ్ ఎన్నికల ఫలితాల్లో బీజేపీకి ఆశాభంగం తప్పలేదు. ఇక్కడ వరుసగా రెండోసారి అధికారం చేపట్టాలని భావించిన బీజేపీకి పెద్ద షాక్ తగిలింది. కాంగ్రెస్ నాయకత్వంలోని విపక్ష కూటమి విజయం సాధించింది. జార్ఖండ్ 11 వ ముఖ్యమంత్రిగా జేఎంఎం నేత హేమంత్ సోరేన్ ప్రమాణం చేశారు.

No comments:

Post a comment