Breaking News

10/10/2019

అవుట్ గోయింగ్ కాల్స్ కు చార్జీలు

ముంబై, అక్టోబరు 10 (way2newstv.in)
జియో అంటే ఆల్ ఫ్రీ. ఇది అందరి మాట. కానీ ఈ మాట గతంలో కలిసిపోబోతుంది. ఎందుకంటే జియో కూడా నేటి నుంచి అవుట్ గోయింగ్ కాల్స్ కు చార్జీలు షురూ చేయనుంది. అవును మీరు చదివింది నిజమే! అక్టోబర్ 10 తర్వాత మీరు ఎప్పుడు రీచార్జ్ చేస్తే అప్పటి నుంచి మీకు అవుట్ గోయింగ్ కాల్స్ పై చార్జీలు పడతాయి.అయితే మీ అవుట్ గోయింగ్ కాల్స్ అన్నిటికీ చార్జీలు పడవు. మీరు జియో సిమ్ నుంచి జియో సిమ్ కు కాల్ చేస్తే మీకు కాల్ చార్జీలు ఉచితమే. అదే జియో నుంచి వేరే నెట్ వర్క్ కు కాల్ చేసినప్పుడు మాత్రమే చార్జీలు పడతాయి. అది కూడా ఎంతో ఎక్కువగా కాకుండా కేవలం నిమిషానికి ఆరు పైసలను మాత్రమే చార్జీగా విధించనున్నారు.
అవుట్ గోయింగ్ కాల్స్ కు చార్జీలు

ఏ మొబైల్ నెట్ వర్క్ నుంచి అయినా మరో మొబైల్ నెట్ వర్క్ కు కాల్ చేసినప్పుడు కాల్ చేసిన నెట్ వర్క్ కు సంబంధించిన సర్వీస్ ప్రొవైడర్, కాల్ అందుకున్న సర్వీస్ ప్రొవైడర్ కు కొంత రుసుము చెల్లించాలి. దీన్నే ఐయూసీ అంటారు. జియో నుంచి కాల్స్ ఉచితం కావడంతో జియో నుంచే ఇతర సర్వీస్ ప్రొవైడర్లకు కాల్స్ ఎక్కువగా వెళుతూ ఉంటాయి. కాబట్టి ఈ ఐయూసీ భారం జియో పైనే పడుతుంది. ఇన్నాళ్లూ ఎలాగోలా లాక్కొచ్చినా ఇకపై లాగడం ఇబ్బందేననుకున్న జియో ఐయూసీ కాడిని కస్టమర్ల భుజాల మీదకు వేసింది.అయితే ఈ ఐయూసీ చార్జీలకు సంబంధించి కూడా వినియోగదారులకు ఉపశమనం కలిగే వార్త ఒకటి ఉంది. ఈ చార్జీల కోసం ఐయూసీ టాపప్ అని ప్రత్యేకమైన టాపప్ వోచర్లు ఉంటాయి. ఆ వోచర్ల ద్వారా రీచార్జ్ చేసుకున్నప్పుడు మాత్రమే బయట నెట్ వర్క్ లకు కాల్ చేసుకోవచ్చు. రూ.10 టాపప్ తో 124 నిమిషాలు, రూ.20 టాపప్ తో 249 నిమిషాలు, రూ.50 టాపప్ తో 656 నిమిషాలు, రూ.100 టాపప్ తో 1,362 నిమిషాల పాటు బైట నెట్ వర్క్ లతో మాట్లాడవచ్చు. అయితే ఈ ఐయూసీ చార్జీలకు పరిహారంగా ప్రతి రూ.10 టాపప్ కి 1 జీబీ డేటా ఉచితంగా లభిస్తుంది. అంటే రూ.20 టాపప్ కు 2 జీబీ, రూ.50 టాపప్ కు 5 జీబీ, రూ.100 టాపప్ కు 10 జీబీ చొప్పున అన్నమాట.ఈ ఐయూసీ చార్జీలను వినియోగదారుల నుంచి ఎంతకాలం పాటు వసూలు చేయనుందో కూడా జియో తెలిపింది. ట్రాయ్ ఎప్పుడైతే ఐయూసీ చార్జీలను రద్దు చేస్తుందో అప్పుడే తాము కూడా ఈ చార్జీలు రద్దు చేస్తామని జియో ప్రకటనలో పేర్కొంది. అయితే ట్రాయ్ అంత సాహసోపేత నిర్ణయం అప్పుడే తీసుకోదు కాబట్టి కొన్నాళ్లు మళ్లీ రీచార్జులు చేసుకునే సాంప్రదాయం ప్రారంభమైనట్లే. మరి జియో తరహాలోనే మిగతా నెట్ వర్క్ లు కూడా ఈ ఐయూసీ చార్జీల పేరిట ప్రత్యేక బాదుడు ఏమైనా మొదలు పెడతాయేమో చూడాలి మరి!

No comments:

Post a comment