Breaking News

24/08/2019

జల వనరుల పునరుద్ధరణలో తెలంగాణ నెంబర్ వన్

హైద్రాబాద్ ఆగస్టు 24 (way2newstv.in - Swamy Naidu)
తెలంగాణ ప్రభుత్వం మరో ఘనతను సొంతం చేసుకుంది. నీటి పునరుద్ధరణకు రాష్ట్రం ప్రభుత్వం అనుసరిస్తున్న విధానాలపై నీతిఆయోగ్ ప్రశంసలు కురిపించింది. ముఖ్యంగా చెరువుల పునరుద్ధరణకు తెలంగాణ ప్రభుత్వం ప్రతిష్టాత్మకంగా ప్రవేశపెట్టిన మిషన్ కాకతీయ పథకం ద్వారా మెరుగైన ఫలితాలు సాధించిందని తెలిపింది. ‘జల వనరుల పునరుద్ధరణ’ విషయంలో తెలంగాణ రాష్ట్రం దేశంలోనే ప్రథమ స్థానంలో నిలిచిందని శుక్రవారం విడుదల చేసిన ‘వాటర్ మేనేజ్‌మెంట్ ఇండెక్స్’లో పేర్కొంది. దేశంలోని జలవనరుల సంరక్షణ, తాగు, సాగునీరు సరఫరా విషయంలో రాష్ట్రాలు చేపట్టిన చర్యల ఆధారంగా నీతిఆయోగ్ గత మూడేళ్ల నుంచి ర్యాంకులను ప్రకటిస్తోంది. 
 జల వనరుల పునరుద్ధరణలో తెలంగాణ నెంబర్ వన్
ఈ మేరకు ‘వాటర్ మేనేజ్‌మెంట్ ఇండెక్స్‌’ 2018-19 నివేదికను కేంద్ర జలశక్తి మంత్రి గజేంద్ర సింగ్ షెకావత్, నీతి ఆయోగ్‌ ఉపాధ్యక్షుడు రాజీవ్‌కుమార్‌, సీఈఓ అమితాబ్‌కాంత్‌ విడుదల చేశారు. మొత్తం తొమ్మిది విభాగాలకు సంబంధించి ఈ నివేదికను రూపొందిచారు. ఈ నివేదికలో మిషన్ కాకతీయ పథకాన్ని ప్రస్తావిస్తూ నీతి ఆయోగ్ తెలంగాణ ప్రభుత్వాన్ని ప్రశంసించింది. ఈ పథకంలో భాగంగా చెరువుల ద్వారా సాగునీరు అందుతున్న భూముల పరిధి సుమారు 51.5 శాతం పెరిగిందని నివేదికలో పేర్కొంది. జలవనరుల కింద సాగునీటి యోగ్యతను తెలంగాణ రాష్ట్రం వంద శాతం పునరుద్ధరించిందని తెలిపింది. నీతి ఆయోగ్ విడుదల చేసిన వాటర్ మేనేజ్‌మెంట్ ఇండెక్స్ ర్యాంకుల్లో అన్ని విభాగాల్లో కలిపి గుజరాత్ అగ్రస్థానంలో నిలిచింది. ఆ రాష్ట్రం 75 పాయింట్లతో వరుసగా మూడోసారి తొలి స్థానం సాధించగా, 74 పాయింట్లతో ఆంధ్ర ప్రదేశ్ రెండో స్థానంలో, 71 పాయింట్లతో మధ్య ప్రదేశ్ మూడో స్థానంలో నిలిచాయి. జల నిర్వహణలో జార్ఖండ్, ఉత్తరప్రదేశ్, బిహార్, ఒడిశా రాష్ట్రాలు చాలా వెనకబడి ఉన్నాయి. అయితే నీటి పునరుద్ధరణలో అగ్రస్థానంలో నిలిచిన తెలంగాణ.. జల నిర్వహణలో మాత్రం 50 పాయింట్లతో 10వ స్థానంలో నిలవడం గమనార్హం. నీటి సంక్షోభం కారణంగా 2050 నాటికి దేశ జీడీపీ 6 శాతం తగ్గిపోతుందని నీతిఆయోగ్ హెచ్చరించింది. దేశంలో 2030 నాటికి నీటి కొరత భారీగా ఏర్పడుతుందని, సరఫరా కంటే డిమాండ్ రెండు రెట్లు మించిపోతుందని తెలిపింది. వార్షిక తలసరి నీటి లభ్యత 2050 నాటికి 1,140 క్యూబిక్ మీటర్లకు తగ్గిపోనుందని, ఇది అధికారిక నీటి కొరత పరిమితి 1,000 క్యూబిక్ మీటర్లకు దగ్గరగా ఉంటుందని వివరించింది. 

No comments:

Post a Comment